އ.ދ ގެ އާއްމު ޖަލްސާގައި ރައީސުލް ޖުމްހޫރިއްޔާ މުޙައްމަދު ނަޝީދު ބައިވެރިވެވަޑައިގަންނަވާނެކަމުގައި ޚާރިޖީ ވަޒީރު ވިދާޅުވެއްޖެ

މިއަހަރު އޮންނަ އ.ދ ގެ އާއްމު ޖަލްސާގައި ރައީސުލް ޖުމްހޫރިއްޔާ މުޙައްމަދު ނަޝީދު ބައިވެރިވެވަޑައިގަންނަވާނެކަމުގައި ޚާރިޖީ ވަޒީރު ވިދާޅުވެއްޖެއެވެ. ނޫސްވެރިންނާ ބައްދަލްކުރައްވާ ވާހަކަދައްކަވަމުން ޚާރިޖީ ވަޒީރު އަހުމަދު ޝަހީދު ވިދާޅުވީ ސަރުކާރުގެ ޚަރަދުގައި އެމެރިކާޔަށް ވަޑައިނުގަންނަވާ ގޮތަށް އޮތުމަށްފަހު މިހާރު އެމެރިކާއަށް ވަޑައިގަތުމަށް ނިންމަވާފައި މިވަނީ މި ދަތުރުގެ ޚަރަދުތަށް އެކި ފަރާތްތަކުގެ ދީލަތި އެހީއިން ނިންމޭ ގޮތް ވުމުން ކަމުގައެވެ.

ބޭރުގެ ޖަމާއަތްތަކުން ރާއްޖެއަށް އެހީ ލިބުނީ ކޮން ގައުމުތަކަކުންތޯ ނޫސްވެރިއަކު އެހުމުން ޝަހީދް ވިދާޅުވީ، އެހީ ދިން ފަރާތް ތަކުގައި އެކުވެރި ގައުމުތަށް ވެސް ހިމެނޭ ކަމަށާއި ނަމަވެސް އެފަރާތް ތަކުގެ ނަން ހާމަ ނުކުރެއްވުމަށް އެ ފަރާތް ތަކުންވަނީ އެދިފައިކަމަށެވެ. ސަބަބެއްކަމަށް ވިދާޅުވީ، ރާއްޖެ އަށް މި އެހީ ދީފި ނަމަ އެހެން ފަރާތް ތަކަށް ވެސް މި އެހީ ދޭން ޖެހޭނެ ކަމަށާ އެހެން ކަމުން އެއީ އެފަރާތްތަކަށް ފަސޭހަ ކަމަކަށް ނުވާތީކަމަށެވެ.

މީގެއިތުރުން ޑެންމާކުގެ ވެރިރަށް ކޮޕެންހޭގަންގައި ބާއްވާ ތިމާވެއްޓާ ބެހޭ ސަމިޓުގައިވެސް ރާއްޖޭގެ ރައީސަށް ބައިވެރިވެ ވަޑައިގެންނެވޭނެކަމުގެ ޔަގީންކަން ޑެންމާކު ސަރުކާރުން ދީފިއެވެ. ރާއްޖޭގެ މާލީ ހާލަތު ހުރިގޮތުން އެފަދަ ޚަރަދެއްކުރެވެން ނެތްކަން ރައީސް ނަޝީދު ހާމަކުރެއްވުމާ ގުޅިގެން ޑެންމާކުގެ ޓެބްލޮއިޑް ނޫހެއް ކަމަށްވާ ދަ ކޮޕެންހޭގަން ޕޯސްޓް ވެބްސައިޓުގައި ޑެންމާކުގެ ޑިވެލޮޕްމަންޓް މިނިސްޓަރު އޫލާ ޓޯރްނީޒްއާ ހަވާލާދީ ބުނެފައި ވަނީ ރާއްޖޭފަދަ ތިމާވެށީގެ ނާޒުކުކަން ކުރިމަތިވެފައިވާ ގައުމުތަކުން މިސަމިޓްގައި ބައިވެރިވުން މުހިންމު ކަމަށާއި ރާއްޖެއަށް މިސަމިޓްގައި ބައިވެރިވެވޭނެ ކަމަށާއި އެމަގު ތަނަވަސްވެފައިވާ ކަމަށެވެ.

ރައީސުލް ޖުމްހޫރިއްޔާގެ މި ދަތުރުފުޅުތަކުގައި ވަރަށް މުހިންމު ކަންތައްތަކެއް ކުރައްވާނެ ކަމުގައި އަހުމަދު ޝަހީދު ވިދާޅުވިއެވެ.

ޒަކާތް ބަލައިގަންނަ މުއްދަތު މިއަދުގެ ނިޔަލަށް އިތުރުކޮށްފި

ޒަކާތް ބަލައިގަތުމުގެ މުއްދަތު އިސްލާމިކް މިނިސްޓްރީން މިއަދު (ބްރާސްފަތި) ގެ ނިޔަލަށް އިތުރުކޮށްފައިވާކަމަށް އެމިނިސްޓްރީން ހާމަކުރަށްވައިފިއެވެ. އިސްލާމިކް މިނިސްޓްރީން މައުލޫމާތުދެއްވި ގޮތުގައި މިގޮތަށް މުއްދަތު އިތުރުކުރެއްވީ ޒަކާތް ދެއްކުމަށްޓަކައި ގިނަ އަދަދެއްގެ ބަޔަކު އިއްޔެ އިސްލާމިކްމިނިސްޓްރީއަށް އަންނަމުން ދިއުމާއި ގުޅިގެންނެވެ.

އިސްލާމިކް މިނިސްޓްރީގެ އެސިސްޓެންޓް ޑިރެކްޓަރ އަހުމަދުﷲ ޖަމީލް ވިދާޅުވީ، ވީހާވެސް ގިނަ ފަރާތްތަކަކަށް ފިޠުރުޒަކާތް ދެއްކުމުގެ ފުރުސަތުދެއްވުމުގެ ގޮތުން އިއްޔެއާއި މިއަދު، ފިޠުރު ޒަކާތް ބަލައިގަތުމަށް މިހާރު ހަމަޖައްސާފައިވާ ކަމަށާއި، އަދި ކުރިންވެސް ޒަކާތް ބަލައިގަންނަމުން އައިގަޑިތައްކަމުގައިވާ، ހެނދުނު 9:30 ން ހަވީރު 6:00 އާއި ހަމައަށް އިސްލާމިކްމިނިސްޓްރީން ޒަކާތްބަލައިގަންނާނެކަމަށެވެ. އަދި ރޭގަނޑު 10:30 ވަންދެން ޒަކާތް ބައލިގަންނަ ގޮތަށް ހަމަޖެހިފައިވާ ކަމަށެވެ.

ޒަކާތް ދެއްކުމަށް ކަޑައަޅާފައިވާ  މުއްދަތު އަންގާރަ ދުވަހުގެ ނިޔަލަށް ހަމަވެފައިވާކަން އިއުލާންކޮށް އެދުވަހު އިސްލާމިކް މިނިސްޓްރީންވަނީ މާލޭގައި ފިޠުރުޒަކާތް ބަލައި ގަތުމަށް އިސްލާމީ މަރުކަޒުގައި ޤާއިމްކޮށްފައިވާ  މަރުކަޒު ފިޔަވައި ރާއްޖޭގެ އެއްވެސް ރަށަކުން ޒަކާތް ބަލައިނުގަންނަ ގޮތަށް ހަމަޖައްސަވާފައެވެ.

“ހާމަ” ނޫހުން ދެންނެވި ސުވާޅަކަށް ޖަވާބު ދެއްވަމުން އިސްލާމިކް މިނިސްޓްރީގެ އެސިސްޓެންޓް ޑިރެކްޓަރ އަހުމަދުﷲ ޖަމީލް ވިދާޅުވީ، އަންގާރަ ދުވަހުގެ މެންދުރު 12:00 ން ފެށީގެން ހުރިހާ  ރަށެއްގައިވެސް ޒަކާތް ބަލައިގަތުން ހުއްޓާލާފައިވާނެ ކަމަށެވެ. އަދި އަންގާރަ ދުވަހަށްފަހު ޒަކާތް ބަލައިގަތުން ކުރިޔަށް ގެންދާ ގޮތަށް ހަމައެކަނި ހަމަޖައްސާފައިވަނީ އިސްލާމިކް މިނިސްޓްރީގައި ޤާއިމްކުރެވިފައިވާ މަރުކަޒުން އެކަނި ކަމަށްވެސް އަޙުމަދުﷲ ވިދާޅުވިއެވެ.

އެސްއެމްއެސް މެދުވެރިކޮށް ފިޠުރުޒަކާތް ދެއްކޭގޮތް އިސްލާމިކް މިނިސްޓްރީން ތައާރަފްކުރުމާިއ ގުޅިގެން ވަރަށް ގިނަ އަދަދެއްގެ ބަޔަކު އެސްއެމްއެސް މެދުވެރިކޮށް ޒަކާތް ދައްކާފައިވާ ކަމަށް އަޙުމަދުﷲ ވިދާޅުވިއެވެ. އެގޮތުން މުޅީއެކު 15326 މީޙުން ޒަކާތް ދެއްކާފައިވާ ކަމަށާއި، މުޅި ޖުމްލަ 337237 ރ. ލިބިފައިވާ ކަމަށް އަޙުމަދުﷲ ވިދާޅުވިއެވެ.

އެސްއެމްއެސް މެދުވެރިކޮށް ދިރާގުގެ ކަސްޓަމަރުންގެ ގޮތުގައި 13801 މީހުން ޒަކާތުގެ ގޮތުގައި 33746 ރ. ދައްކާފައިވާއިރު، ވަޠަނިއްޔާގެ ކަސްޓަމަރުންގެ ގޮތުގައި 1525 މީޙުން ޒަކާތުގެ ގޮތުގައި 33491ރ. ދައްކާފައިވާ ކަމަށް އިސްލާމިކް މިނިސްޓްރީން ހާމަކުރަށްވައެވެ.

އެސްއެމްއެސް މެދުވެރިކޮށް ޒަކާތް ދެއްކޭނެ ގޮތަށް ހުޅުވާލުން ވެގެންދިޔައީ ޒަކާތް ދެއްކުމަށް ގިނަ ބަޔަކަށް ލިބިގެންދިޔަ ވަރަށް ބޮޑު ފަސޭހައެއް ކަމަށް އިސްލާމިކް މިނިސްޓްރީން ހާމަކުރައްވައެވެ.

ޓީ.ވީ ޗެނެލާއި މަދްރަސާކުދިން ނަމާދުކުރާ ކޮޓަރިތަކާއި ފާޚާނާތައް ޒަކާތުގެ ފައިސާ ހޭދަކޮށްގެން ނުހެއްދެވުމަށް ޑީއާރްޕީން ގޮވާލައިފި ޓީ.ވީ ޗެނެލާއި މަދްރަސާކުދިން ނަމާދުކުރާ ކޮޓަރިތަކާއި ފާޚާނާތައް ޒަކާތުގެ ފައިސާ ހޭދަކޮށްގެން ނުހެއްދެވުމަށް ޑީއާރްޕީން ގޮވާލައިފި

މިނިސްޓްރީ އޮފް އިސްލާމިކް އެފެއާރޒުން ހެއްދެވުމަށް ނިންމަވައި، އިޢުލާނު ކުރައްވާފައިވާ ޓީ.ވީ ޗެނެލާއި، މަދްރަސާކުދިން ނަމާދުކުރާ ކޮޓަރިތަކާއި، ފާޚާނާތައް، ޒަކާތުގެ ފައިސާ ހޭދަކޮށްގެން ނުހެއްދެވުމަށާއި ﷲއަށް ބިރުވެތިވެ، އެކަލާނގެ އަމުރުފުޅުތަކަށް ފުރިހަމައަށް ކިޔަމަންވެ ވަޑައިގަތުމަށް ޑީއާރްޕީން ސަރުކާރަށް ގޮވާލައްވައިފިއެވެ.

ޒަކާތަކީ، އިސްލާމްދީން، އެ ފަސްރުކުނެއްގެ މައްޗަށް ބިނާވެގެންވާ ރުކުންތަކުގެ ތެރެއިން އެއްރުކުންކަމަށާއި ކީރިތި ޤުރްއާނާއި، ރަސޫލާގެ ސުންނަތުން، މިކަން ސާބިތުވެފައިވާކަމަށާއި، އަދި ޒަކާތް ނުދޭ މީހުންނަށް ދުނިޔެއާއި އާޚިރަތުގައި ހުރި ނިކަމެތިކަމާއި ވޭންދެނިވި ޢަޒާބު، ކީރިތި ޤުރްއާނާއި، ރަސޫލާގެ ސުންނަތުން، ސާބިތުވާކަމަށް ޑީއާރްޕީން ބުނެއެވެ. މިކަން އައްތައުބާ ސޫރަތުގެ 34 އާއި 35 ވަނަ އާޔަތާއި، އާލްޢިމްރާން ސޫރަތުގެ 180 ވަނަ އާޔަތާއި، އަލްބުޚާރީގެ 1403 ވަނަ ޙަދީޘާއި، މުސްލިމް ގެ 2292 ވަނަ ޙަދީޘުން، މިކަން ވަރަށް ރަނގަޅަށް އެނގެން އެބައޮތްކަމަށެވެ.

ޒަކާތުގެ ތަކެތި ޙައްޤުވަނީ، އަށްބާވަތެއްގެ މީހުންނަށާއި އެއީ އައްތައުބާ ސޫރަތުގެ 60 ވަނަ އާޔަތުގައި، މާތްﷲ ބަޔާން ކުރައްވާފައިވާ، އަށްބާވަތުގެ މީހުންނަށްކަމަށް ޑީއާރްޕީން ހާމަކުރެއެވެ. އެއާޔަތުގައި މާތްﷲ ވަޙީ ކުރައްވާފައިވެއެވެ. “إِنَّمَا الصَّدَقَاتُ لِلْفُقَرَاۤءِ، وَالْمَسَاكِينِ، وَالْعَامِلِينَ عَلَيْهَا، وَالْمُؤَلَّفَةِ قُلُوبُهُمْ، وَفِى الرِّقَابِ، وَالْغَارِمِينَ، وَفِى سَبِيلِ اللَّهِ، وَابْنِ السَّبِيلِ: فَرِيضَةً مِّنَ اللَّهِ وَاللَّهُ عَلِيمٌ حَكِيمٌ.“  މާނައީ: ހަމަކަށަވަރުން، ޞަދަޤާތުގެ (އެބަހީ: ޒަކާތުގެ) ތަކެތި ވަނީ، ފަޤީރުންނަށާއި، މިސްކީނުންނަށާއި، އެކަމުގެ ޢާމިލުންނަށާއި، އެއުރެންގެ ހިތްތައް އެކުވެރިކުރައްވާ މީހުންނަށާއި، (އެބަހީ: އަލަށް އިސްލާމްވާ މީހުންނަށާއި) އަޅުން މިނިވަން ކުރުމުގައްޔާއި ދަރަނިވެރިންނަށާއި، ﷲ ގެ މަގުގައްޔާއި (ޙާލުގައި ޖެހިފައިވާ) ދަތުރުވެރިން ނަށެވެ. ﷲ ގެ ޙަޟްރަތުން ކަނޑައަޅުއްވާފައިވާ ފަރްޟެއްގެ ގޮތުގައެވެ. ﷲ އީ، މޮޅަށް ދެނެވޮޑިގެންވާ، ޙަކީމުވަންތަ ރަސްކަލާނގެއެވެ.”

ޢިލްމުވެރިން ވިދާޅުވާގޮތުގައި، ޒަކާތަށް ލިބޭ މުދަލަކުން، ކީރިތި ޤުރްއާނުގައި ﷲ ކަނޑައަޅުއްވާފައިވާ މި އަށް ބާވަތުގެ މީހުން ފިޔަވައި، އެހެން ފަރާތަކަށް، ނުވަތަ އެހެން ކަމަކަށް ހޭދަކުރުމީ، ހުއްދަކަމެއް ނޫންކަމަށާއި އެއީ މާތްﷲ ތައުބާ ސޫރަތުގެ 60 ވަނަ އާޔަތުގައި، ޒަކާތުގެ މުދާ ޙައްޤުވާ ފަރާތްތައް،  އަށް ބައެއްގައި ޙަޞްރު ކުރައްވައި ހިފަހައްޓަވާފައި ވާތީކަމަށް ޑީއާރްޕީން ބުނެއެވެ.

ފިޤްހުއްސުންނާގެ ފުރަތަމަ ބައިގެ 339 ވަނަ ޞަފްޙާގައި ބަޔާން ކުރައްވާފައިވަނީ، ﷲ އަށް ކުއްތަންވުމުގެ ނިޔަތުގައި ނަމަވެސް، ﷲ ކަނޑައަޅުއްވާފައިވާ، އަށް ބާވަތުގެ މީހުން ފިޔަވައި އެހެން އެއްވެސް ފަރާތަކަށް، ނުވަތަ ކަމަކަށް، ޒަކާތުގެ ފައިސާއިން ހޭދަކުރުމީ، ހުއްދަކަމެއް ނޫންކަމަށްވެސް ޑީއާރްޕީންބުނެއެވެ. މިސާލަކަށް، މިސްކިތްތައް ބިނާކުރުމަށާއި، މަގުތައް ހެދުމަށާއި، ފާލަންތައް އެޅުމަށާއި، މެހްމާނުންނަށް ހޭދަކުރުމަށާއި، ފަޤީރުން މަރުވުމުން، ކަށުކަމާކެމީގެ ކަންތައް ކުރުމަށާއި، އެނޫނަސް މިފަދަ ޢާންމު ފައިދާގެ ކަންކަމަށް، ޒަކާތުގެ ފައިސާއިން ހޭދަކުރުމީ، ހުއްދަކަމެއް ނޫންކަމުގައި ޑީއާރްޕީން ދެކޭކަމަށް ހާމަކުރެއެވެ.

މިކަން އޮތީ މިހެން ކަމުން، އެއްވެސް ޙާލެއްގައި، ޒަކާތުގެ ފައިސާއިން ހޭދަކޮށްގެން ޓީ.ވީ ޗެނަލެއް ހެދުމާއި، ކިޔަވާކުދިން ނަމާދުކުރާނޭ ކޮޓަރިތަކާއި، ފާޚާނާތައް ހެދުމީ، ހުއްދަކަމެއް ނޫނެވެ. މިހެން މިކަން ކޮށްފިނަމަ އެއީ، ﷲ ކީރިތި ޤުރްއާނުގެ ޞަރީޙަ ނައްޞަކުން، ޙަޞްރުގެ ޞީޣާގައި ބަޔާން ކުރައްވާފައިވާ ޤަޠްޢީ ޙުކުމަކާ ޚިލާފަށް ޢަމަލުކުރެވެނީކަމަށާއި، މިއީ އެއްވެސް މުސްލިމަކު ކުރުން ހުއްދަ ކަމެއްނޫންކަމަށް ޑީއާރްޕީން ބަޔާންކުރެއެވެ.